Tímaritið Saga hefur fyrir löngu áunnið sér sess sem fremsta fagtímarit íslenskra sagnfræðinga. Það kemur út tvisvar á ári og í því birtast ritrýndar fræðigreinar á hinum ýmsu sviðum sagnfræði og sögulegra fræða. Saga leggur ennfremur metnað sinn í að fjalla um nýlega útkomin rit sem tengjast sögu Íslands eða íslenskum fræðaheimi. Áskrifendur Sögu eru jafnframt félagar í Sögufélagi.
Ritstjórar Sögu eru dr. Vilhelm Vilhelmsson og Kristín Svava Tómasdóttir. Hafa má samband við ritstjóra Sögu gegnum netfangið saga@sogufelag.is.
Ritstjórunum til fulltingis starfar fagleg ritnefnd.
Ritnefnd Sögu:
Davíð Ólafsson
Helgi Skúli Kjartansson
Helgi Þorláksson
Ragnheiður Kristjánsdóttir
Sveinn Agnarsson
Lengdarmörk ritrýndra greina í Sögu eru 8–10.000 orð.
Ritreglur Sögu.
Tímaritið birtir þrenns konar umfjallanir um bækur: a) ítardóma þar sem nokkur rit eru borin saman í lengra máli, b) ritdóma um einstök verk, og c) ritfregnir sem ætlað er að vera stutt kynning á mikilvægum sögulegum fræðiritum, s.s. greinasöfnum, ráðstefnuritum, uppsláttarritum, stoðritum og þýddum verkum.
Leiðbeiningar fyrir höfunda ítardóma, ritdóma og ritfregna.
Tímaritið Saga hóf göngu sína árið 1949. Fyrstu árin kom Saga út í örkum og var nokkrum árlegum arkarútgáfum síðan slegið saman í eitt bindi. Þetta veldur því að merktir árgangar útgáfunnar eru mun færri en útgáfuárin segja til um.
Frá áttunda áratug 20. aldar kom Saga út reglulega, eitt myndarlegt hefti á ári hverju. Árið 2002 hóf Saga síðan að koma út í tveimur heftum árlega, að vori og hausti. Í dag eru eldri árgangar Sögu allir aðgengilegir á Tímarit.is.
Sögufélag hefur gefið út tvö tímarit önnur en Sögu: Blöndu og Nýja sögu. Forgöngumenn félagsins höfðu skilning á því að ekki væri nægilegt að bera á borð það hráefni í sögu sem heimildir eru, heldur þyrfti að vinna úr efninu læsilegar frásagnir við hæfi almennings. Þetta miðlunarhlutverk rækti félagið fyrst með því að gefa út Blöndu á árunum 1918-1953. Tímaritið birti ritgerðir og ýmiss konar heimildafróðleik og hlaut brátt miklar vinsældir. Blanda er aðgengileg í heild sinni á Tímarit.is.
Á árunum 1987-2001 gaf Sögufélag út tímaritið Nýja sögu, en það hóf göngu sína að frumkvæði ungra sagnfræðinga í Sögufélagi. Markmið útgáfunnar var að ná til víðari hóps lesenda en tekist hafði með Sögu; að því átti meðal annars að stuðla nýstárleg hönnun og birting mynda. Ný saga kom út til ársins 2001, alls 13 árgangar, en þegar Saga fór að koma út tvisvar á ári var útgáfu Nýrrar sögu hætt. Rétt eins og Blanda er Ný saga öll aðgengileg á Tímarit.is.